14.02.2011

Ongerbarmer

Plattkaller bestollt seck en Platte

Woar getz es iingeladen. Tum Eeten, biem Griechen. Hau, deiten eck, dä hätt all de Platten dropp, do besse als Plattkaller god opgehowen.

Do woaren vie dann. Minn Kumpel, dä meck iingeladen hatten, es wall öfters he. Bold schon koom dä Plattendräger un wollten weeten wat vie drenken wollen. Son Gewitzten, he schow us grad schon de Kaate un son Kleenen gliek röwer, son Anisschnappes, en USO. Eengentlich sollten man dä jo hängerhear suppen, vöar de Verdauung un gegen dä Knofel em Muul.

Vie bestollten user Bier un noomen es drekt unsern USO tu de Boscht. No twei Minüdden woar dä Kääl schon medm Pils doh, bie dä geit et all wat schneller, wat vie eeten wollen, wollten hä gliek weeten. „Vie senn nit oppe Flucht“, saiten eck däm Sophokles, föar de Kaate hatten vie doh no kinne Tied.

Dann gowen vie us annet bekieken. Vöarspeisen noch un nöcher, kalt un heet. Hauptspeisen, med un ohne Gyros, un do woren se de Platten. Eck föllten meck gliek tuhuus, eck ennen vanne letzten Plattkaller em Dahl, dä Grönder vam Plattkallerforom. Dateen (13) Platten tum Uutwählen.

Dä Iinlader woar ook am Knöstern, wosten awwer gliek watte wollt. Hät wöard emmer dat Glieke eeten, saiten hä tu meck, de Gyrosplatte. Eck woar awwer noh nit so wiet, schwankten noh töschen Akropolis- un Dionysosplatte. „Wat“ saieten dä, dä söss de Usoplatte bestollt, dat klengt ook toff.

Do koom dä Plattendräger ad wear, konnten et wohl ruuken, dat vie sowiet woaren.

Eck sollten tuearst bestollen, wöar jo iingeladen. „Dann es loss“, saiten eck däm med dem kleenen Block, „dann nemm eck de Akropolisplatte“, klappten min Book tu un gow et emm. Dä Opschriewer schow sinne Oogen op minnen Kumpel, mackten en kotte Bewegong medm Kopp.

„Dann nemm eck dat getz ook“, saiten dä Konvertierte tu emm. Dä getz de Akropolis twei mol om Zeedel stonn hatten grinsten, un saiten nom Kompel sinne Moppe: „Du bist ein richtiger Epigone“ un leep dovan dat Eeten tu hollen. Mien Kumpel kiekten meck getz verdattert aan, schien et nit tu verstonn un widderhollten „Epigone – wat es dat?“

„Dat kann eck deck saien, lewen Manfred“, saiten eck tu em, „dat es eenen des allet nohmackt. Dat kann eck van eenem Plattkaller van NJUUZ, bloas dä hät ock noh hongert Jubelperser.

Getz woar op soa völl Kultur fäädich un bestollten seck es ears en nüen USO.

Anmelden

Aktuelle Stellenangebote:

Kommentare

Neuen Kommentar verfassen

Deine E-Mail-Adresse wird nicht veröffentlicht. Erforderliche Felder sind mit * markiert.